អន្តរជាតិ June 25, 2019 lyda
ប្រធានាធិបតីអ៊ីរ៉ង់ Hassan Rouhani ចំអកថា ការដាក់ទណ្ឌកម្មរបស់អាមេរិកជារឿង «ឆ្គួតលីលា»

ក្នុងថ្ងៃអង្គារនេះក្រុមមន្ត្រីអ៊ីរ៉ង់បានរិះគន់រដ្ឋបាលរបស់លោក Donald Trump យ៉ាងចាស់ដៃ ចំពោះការដាក់ទណ្ឌកម្មថ្មីរបស់អាមេរិក ដែលបានផ្ដោតទៅលើការដឹកនាំរបស់ប្រទេសអ៊ីរ៉ង់។ ពួកគេនិយាយថា វិធានការរបស់អាមេរិកបានបិទផ្លូវឆ្ពោះទៅរកការការទូតជាអចិន្ត្រៃយ៍ ហើយថាសេតវិមានបានក្លាយជាជន «ពិការខួរក្បាល» ក្រោមការដឹកនាំរបស់ប្រធានាធិបតីបច្ចុប្បន្ន។ ប្រធានាធិបតីអ៊ីរ៉ង់លោក Hassan Rouhani បានហៅការដាក់កំហិតរបស់អាមេរិកថា ជារឿងដែល «សាហាវយង់ឃ្នង និងលីលា» ហើយបាននិយាយថា អាមេរិកបានបង្ហាញពី «ការបរាជ័យយ៉ាងពិតប្រាកដ» ដែលថាពួកគេនឹងផ្តាច់ខ្លួនចេញពីអ៊ីរ៉ង់។

<

ឆ្លើយតបចំពោះការស្នើផែនការដាក់ទណ្ឌកម្មទៅលើលោក Mohammad Javad Zarif រដ្ឋមន្រ្តីក្រសួងការបរទេសអ៊ីរ៉ង់នាពេលថ្មីៗនេះ ប្រធានាធិបតីលោក Hassan Rouhani បាននិយាយថា «អ្នកចង់ដាក់ទណ្ឌកម្មមករដ្ឋមន្រ្តីការបរទេស ដំណាលគ្នាជាមួយសំណើសុំការចរចា?»។ ក្នុងនោះផងដែរ មន្ដ្រីក្រសួងការបរទេសអ៊ីរ៉ង់លោក Abbas Mousavi ក៏បានសរសេរសារលើបណ្ដាញ Twitter ថា ទណ្ឌកម្មអត់ប្រយោជន៍ ដែលដាក់មកលើមេដឹកនាំកំពូល Ali Khamenei និង Mohammad Javad Zarif ដែលជាអ្នកដឹកនាំការចរចានុយក្លេអ៊ែរអ៊ីរ៉ង់ជាមួយអាមេរិក មានន័យថា «ជាការបិទទ្វារនៃការការទូតជាអចិន្ត្រៃយ៍» «រដ្ឋាភិបាលរបស់លោក Donald Trump កំពុងបំផ្លាញគ្រប់យន្តការអន្តរជាតិ ដែលបានបង្កើតឡើងដើម្បីរក្សាសន្តិភាព និងសន្តិសុខពិភពលោក»៕

អត្ថបទ៖ លីដា
ប្រភព៖ washingtonpost